Haförninn

Um örninn | Fjöldi | Útbreiðsla | Setur | Tjón | Staða | Útlönd

Hvað eru mörg arnarsetur á Íslandi?
Ernir helga sér óðal (varpsvæði) sem nefnt er arnarsetur og eru á hverju óðali einn eða fleiri varpstaðir. Alls er vitað með vissu um 168 arnarsetur í landinu og eru þau langflest á núverandi varpslóðum arna, sem ná frá sunnanverðum Faxaflóa til Húnaflóa. Líklegt má telja að arnarsetrin hafi verið mun fleiri, því skipuleg söfnun upplýsinga um arnarstofninn hófst ekki fyrr en um 1920 þegar flest setrin voru löngu komin í eyði.

Hvað var stofninn stór?
Vitað er með vissu um arnarvarp á rúmlega 100 stöðum á síðustu öld og fram yfir aldamót. Sumir þessara varpstaða fóru í eyði á síðari hluta 19. aldar og ólíklegt er að ernir hafi orpið á öllum setrunum samtímis. Á móti kemur að mörg arnarsetur komust aldrei á spjöld sögunnar. Varlega áætlað hafa því orpið hér a.m.k. 100 pör áður en ofsóknir gegn örnum hófust fyrir alvöru í lok 19. aldar. Pörin gætu þó hafa verið mun fleiri, jafnvel 150.

Forn setur
Þrátt fyrir að ernir hafi ekki orpið á sumum setrum í 100-150 ár eru enn ummerki um dvöl þeirra þar; hvanngresi og blómstóð vegna áburðar um aldaskeið. Á síðustu árum (1994-2003) hefur arnarstofninn vaxið um 15 pör (úr 42 í 57). Oftast nær hafa þessi “nýju” pör” orpið á stöðum þar sem öruggar heimildir eru um arnarvarp áður fyrr; sum þessara setra höfðu verið í eyði í allt að 120 ár er ernir tóku sér þar bólfestu að nýju. Það má því telja líklegt að ernir muni smám saman nema land á sínum gömlu heimaslóðum, svo fremi sem stofninn haldi áfram að dafna og setrunum verði ekki raskað eða þau gerð óbyggileg með átroðningi og mikilli umferð. Það er því afar mikilvægt fyrir framtíð arnarstofnsins að vernda þessi gömlu setur.

Lóndrangar á Snæfellsnesi, fornt arnarsetur Ljósmynd © Daníel Bergmann

Heimildir eru um arnarvarp á sumum arnarsetrum um 150 ára skeið, t.d. í Lóndröngum á Snæfellsnesi, eða frá því um 1750 og fram yfir aldamótin 1900. Síðan hafa ernir ekki orpið á þeim slóðum. Hið sama á við um nær öll fornu setrin utan Vesturlands og Vestfjarða; þau hafa flest verið í eyði í meira ein eina öld. Endalok arnarvarps í Arnardrang við Hjörleifshöfða (um 1840) og á Loddudrang við Salthöfða hjá Fagurhólsmýri í Öræfum tengjast lambadrápi. Bændur á þessum stöðum grönduðu síðustu örnunum á þeim slóðum vegna þess að þeir töldu þá helst til stórtæka til lambanna.

Meira um örninn: Fjöldi | Útbreiðsla | Tjón | Staða | Útlönd

Til baka