| Ársskýrsla Fuglaverndar 2009 |
 |
| Þriðjudagur, 23. Mars 2010 22:44 |
|
Ársskýrsla Fuglaverndar 2009 Lögð fram á aðalfundi 8. mars 2010 Stjórn starfsársins var kosin á aðalfundi þann 19. febrúar 2009 og skipti hún með sér verkum á fyrsta stjórnarfundi á þennan hátt: Jóhann Óli Hilmarsson, formaður Fuglaverndar; Jakob Sigurðsson, varaformaður; Björk Þorleifsdóttir, ritari, Vigfús Eyjólfsson, gjaldkeri; Ásgerður Einarsdóttir, Edward B. Rickson og Rannveig Thoroddsen meðstjórnendur. Vigfús hætti í stjórn á vormánuðum og tók Edward þá við gjaldkerastöðunni. Aðalfundur ákvað óbreytt árgjald á starfsárinu. Stjórnarfundir voru haldnir 7 sinnum á árinu: 27. janúar, 3. mars, 18. maí, 19. júní, 18. ágúst, 27. september og 18. nóvember. Fjölgun félaga nam 18% á árinu, miðað við greiðandi félaga. Félagatalan er nú komin yfir 1000, en með fjölskylduaðildum er hún nokkuð hærri. Rekstur Skrifstofa Fjárhagur Hjálmar R. Bárðarson náttúruljósmyndari og bókaútgefandi m.m. lést á árinu og arfleiddi hann Fuglavernd ásamt nokkrum öðrum félögum og stofnunum, en hann og Else kona hans voru barnlaus. Hlutur okkar er ætlaður til að endurheimta votlendi, sem gæti e.t.v. orðið keldusvíni til gagns, til verndar varpsvæðum arnarins og til að stuðla að uppbyggingu felubyrgja í fuglafriðlöndum. Félagið stendur í mikilli þakkarskuld við þennan höfðingja og velgjörðarmann.
Athugasemdir og kærur Þann 22. október var kveðinn upp dómur í Hæstarétti í máli sem Fuglavernd ásamt landeigendum og fleiri náttúruverndarfélögum höfðuðu vegna úrskurðar Jónínu Bjartmars, fyrrverandi umhverfisráðherra um leyfa vegagerð um Teigsskóg í Reykhólasveit, á sunnanverðum Vestfjörðum. Málshöfðendur töldu slíka vegagerð hafa í för með gríðarleg óafturkræf umhverfisspjöll í nær ósnortnu umhverfi og höfðuðu því mál til að fá úrskurð ráðherra ógildan. Hæstiréttur felldi úrskurðinn úr gildi. Í júlí sendi félagið áskorun til umhverfisráðherra vegna fækkunar sjófugla. Í september skoraði Fuglavernd á ráðherra að fullgilda AEWA samkomulagið (Alþjóðlegt samkomulag um vernd farfugla og votlendisfugla í Afríku og Evrasíu (African-Eurasian Migratory Waterbird Agreement)).
Sýningar, fyrirlestrar og viðburðir Sýningar og viðburðir Fuglavernd var með kynningu á Umhverfisþingi í október. þá stóð Einar Ó. Þorleifsson vaktina fyrir félagið á kynningarhelgi í Hafnarfirði um fuglagarðinn í samstarfi við Skógræktarfélag Hafnafjarðar. Í nóvember og desember var Fuglavernd með kynningar- og sölubás á jólamarkaði Skógræktarfélags Reykjavíkur, þar sem félagar skiptust á að standa vaktina. Fræðslufundir Á fyrsta fræðslufundi ársins, 15. janúar, hélt Erpur Snær Hansen erindi sem hann nefndi sjófuglaparadísin Vestmannaeyjar. Hinn 7. apríl hélt Kristján Ingimarsson erindi um fuglalíf á Djúpavogi og fuglaverkefnið birds.is. Þann 3. september sögðu þeir Gunnar Þór Hallgrímsson og Jóhann Óli Hilmarsson frá fuglalífi og mannlífi á Ammassalik svæðinu og við Zackenberg á norðaustur Grænlandi. Þriðjudaginn 15. september sagði búlgarski fuglafræðingurinn Sergey Dereliev frá AEWA, sem er Alþjóðlegur samningur um vernd farfugla og votlendisfugla í Afríku og Evrasíu (African-Eurasian Migratory Waterbird Agreement). Sáttmálinn er í tengslum við Umhverfisstofnun Sameinuðu þjóðanna (UNEP). Þann 4. nóvember sagði Yann Kolbeinsson ferðasögu frá Ecuador og sýndi ljósmyndir. Loks sýndi Magnús Magnússon kvikmynd sína „Í ríki fálkans með Ólafi K. Nielsen“ þann 3. desember og sátu þeir félagar fyrir svörum að sýningu lokinni ásamt Karli Sigtryggssyni, sem var hægri hönd Magnúsar við gerð myndarinnar. Garðfuglakönnun og garðfuglaskoðun Fundir erlendis Í febrúar var alþjóðlegur vinnufundur um grænlensku blesgæsina á einni Islay við Skotland. Einar Ó. Þorleifsson sótti fundinn sem fulltrúi Fuglaverndar. Útgáfa Tímaritið Fuglar kom út í 6. sinn í desember en því er einungis dreift til félaga í Fuglavernd og er eitt vandaðasta tímarit um fugla og náttúru sem gefið er út á Íslandi. Ritstjóri var sem fyrr Daníel Bergmann. Fuglavernd gaf út dagatal með úrvali fuglamynda sem voru á sýningu áhugaljósmyndara sem Fuglavernd stóð fyrir á árinu. Fugl vikunnar hóf göngu sína í Fréttablaðinu á aðventu. Þetta er vikulegur pistill, þar sem einn fugl er kynntur hverju sinni, sagt frá amstri hans og útliti. Reynt er að velja fugla sem eru í umræðunni á hverjum tíma. Friðlandið í Flóa Vinna hélt áfram í Friðlandinu við að búa í haginn fyrir fólk og fugla. Sveitarfélagið og Fuglavernd gerðu veglegt bílastæði við skoðunarhúsið við Stakkholt. Lokið var við húsið og í framhaldi af því var grafin tjörn framan við húsið, til að lokka fugla nær því. Meðfram tjarnargerðinni var fyllt uppí nokkra skurði þar nærri. Í ágúst var hópur sjálfboðaliða frá samtökunum Veraldarvinum að störfum í Friðlandinu, þeir unnu aðallega að frágangi kringum tjörnina og á og við skoðunarhúsið. Boðið var uppá fuglaskoðun í tengslum við hátíðina Vor í Árborg í maílok, félagar í ljósmyndaklúbbnum Fókus heimsóttu staðinn, leikskólabörn og foreldrar þeirra heimsóttu Friðlandið, svo lítið eitt af viðburðum sé tínt til. Mikil ásókn fuglaskoðara og fuglajósmyndara, innlendra sem erlendra, var á svæðið. Katrín Georgsdóttir, sérfræðingur umhverfismála í V-Flóa vann með Fuglavernd í Friðlandinu. Loks má geta þess að kvikmynd Dúa J. Landmark, Úti í mýri, sem fjallar um Friðlandið, var tilbúin, en hún var frumsýnd opinberlega eftir áramót. Samstarf við Umhverfisráðuneytið Nokkrir fundir voru haldnir með ráðherra og/eða starfmönnum ráðuneytisins á árinu, bæði að frumkvæði félagsins og svo sem hluti af samstarfssamningi ráðuneytisins og frjálsra félagasamtaka. Ráðuneytið styrkti starfsemi Fuglaverndar, eins og fram kemur í ársreikningum félagsins. Fuglavernd tók þátt í alþjóðlega farfugladeginum á Álftanesi, í samstarfi við ráðuneytið og jafnframt í sýningu á Umhverfisþingi í október. Sérverkefni Fyrirlestraröð Himbrimavöktun Fuglavernd stendur fyrir vöktun á himbrima á völdum vötnum víða um land. Ólafur Einarsson og Örn Óskarsson eru í forsvari fyrir verkefninu.
|
