|
Náttúruverndarviðurkenning Sigríðar Tómasdóttur |
|
Skrifað af: Hólmfríður Arnardóttir
|
|
Þriðjudagur, 02. Mars 2010 12:51 |
|
 Við vildum benda á að í tilefni af 20 ára afmæli umhverfisráðuneytisins 23. febrúar hefur Svandís Svavarsdóttir umhverfisráðherra ákveðið að heiðra minningu Sigríðar Tómasdóttur í Brattholti með því að afhenda náttúruverndarviðurkenningu Sigríðar Tómasdóttur á degi umhverfisins sem haldinn er þann 25. apríl ár hvert. Viðurkenningin verður afhent einstaklingi sem hefur unnið markvert starf á sviði náttúruverndar í fyrsta sinn á degi umhverfisins á þessu ári. Sigríður Tómasdóttir, fæddist 24. febrúar 1871 í Brattholti. Sigríður var baráttukona og náttúruverndarsinni sem lagði á sig mikið erfiði í baráttu gegn virkjun Gullfoss. Hún var því brautryðjandi á sviði náttúruverndarmála hér á landi og hefur æ síðan verið íslenskum náttúruverndarsinnum fyrirmynd. Hægt er að senda umhverfisráðuneytinu tillögur um einstakling eða einstaklinga sem vegna verka sinna og athafna, eru þess verðugir að hljóta viðurkenninguna.
Tillögurnar þurfa að berast umhverfisráðuneytinu eigi síðar en 1. apríl 2010, merktar ,,Náttúruverndarviðurkenning Sigíðar Tómasdóttur”, á póstfangið
Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það.
eða með pósti í umhverfisráðuneytið, Skuggasundi 1, 150 Reykjavík. |
|
Fugl vikunnar er hávella – öndin sem segir nafnið sitt! |
|
Skrifað af: Hólmfríður Arnardóttir
|
|
Miðvikudagur, 24. Febrúar 2010 12:35 |
 Hávellan er ein algengasta öndin við Ísland á veturna og kemur næst á eftir æðarfuglinum hvað fjöldann varðar. Hún sést jafnt við ströndina og í höfnum sem og lengra úti þar sem hún lifir á svifi. Hávellan kýst helst kalt loftslag. Hún verpur við strendur heimskautalandanna á norðurhveli jarðar. Á veturna sjást hér bæði íslenskir fuglar og vetrargestir frá norðlægari löndum. Eitt af einkennum hávellu er að karlfuglinn, steggurinn, er með áberandi langar miðfjaðrir stéls. Annað sem einkennir hávellu er að hún skiptir oftar um fjaðurham heldur en aðrar endur. Mikið líf og fjör einkennir hávellurnar sérstaklega síðla vetrar og fram á vor. Þá gera steggirnir allt til að ganga í augun á kollunum og synda gólandi kringum þær með stélfjaðrirnar á lofti og eru í sífelldum erjum. Þeir kalla þá nafn sitt í sífellu, há-á-vella. Þessi söngur er mjög einkennandi og þekkist víða á norðurhveli, m.a. nota Grænlendingar hann í veðursöngvum sínum. Söngurinn er einkennandi fyrir íslensk fjallavötn á vorin og heyrist jafnframt mikið í Mývatnssveit. Hávella verpur bæði inn til landsins og við sjávartjarnir og vötn á láglendi. Hún er mun algengari á láglendi norðanlands en sunnan. Hreiðrið er venjulega nærri vatni, vel falið í gróðri og líkist hreiðrum annarra anda. Steggir fella fjaðrir aðallega á sjó. |
|
Fugl vikunnar er bjartmáfur: Vetrargestur norðan úr höfum. |
|
Skrifað af: Hólmfríður Arnardóttir
|
|
Þriðjudagur, 16. Febrúar 2010 10:21 |
 Bjartmáfur kemur hingað á veturna frá varpstöðvum á Grænlandi en hann verpur einnig á Baffinslandi og nálægum Íshafseyjum Kanada. Hann heldur sig mest með ströndum fram, oft með öðrum máfum í höfnum, við ræsi eða þar sem æti er að finna og er hann oft einn algengasti máfurinn í hinum árlegu vetrarfuglatalningum sem Náttúrufræðistofnun skipuleggur um land allt um jólaleytið. Bjartmáfar sjást sjaldan á landi, þó stundum á tjörnum og sjávarlónum og þá helst síðla vetrar eða snemma vors. Hann er líkur hinum alíslenska hvítmáfi en er minni og fíngerðari með hnöttóttara höfuð og brattara enni, frábrugðið flötu höfði hvítmáfs. Búningar og búningaskipti fullorðinna og ungra bjartmáfa eru svipuð og hjá hvítmáfi. Vængir bjartmáfs eru lengri og mjórri en hvítmáfs og ná lengra aftur fyrir stélið. Hann virðist léttari og fimari á flugi og er mun léttari á sundi en hvítmáfur og minnir á fýl. Afturhlutinn vísar á ská upp á við en á hvítmáfi virðist hann láréttur. Bjartmáfurinn velur sér varpstaði líkum hvítmáfinum. Vörpin eru hátt í bröttum fjallshlíðum en einnig á lágum eyjum. Hann hefur aldrei fundist í varpi hér á landi. |
|
|
Fræðslufundur um fugla í íslenskri þjóðtrú |
|
Skrifað af: Hólmfríður Arnardóttir
|
|
Mánudagur, 15. Febrúar 2010 09:32 |
 Miðvikudaginn 17. febrúar verður fimmti fræðslufundur vetrarins. Þá ætlar Sigurður Ægisson að flytja í máli og myndum erindi um fugla í íslenskri þjóðtrú og einnig mun hann koma inná önnur svið sem tengjast þjóðtrúnni, svo sem alþýðuheiti fugla. Sigurður er guðfræðingur og þjóðfræðingur að mennt og hefur um langt ára bil safnað heimildum um íslensku varpfuglana í menningarsögunni. Í erindi sínu mun hann fjalla um þetta áhugamál sitt, einkum það sem lýtur að hlut þjóðtrúarinnar og mun hann leiða viðstadda inn í þennan mjög svo athyglisverða heim.
Fundurinn byrjar kl. 20:30 og er haldinn í húsakynnum Aríons banka í Borgartúni 19. Fundurinn eru öllum opinn svo lengi sem húsrúm leyfir. Aðgangur er ókeypis fyrir félaga í Fuglavernd en aðgangseyrir er 300 krónur fyrir aðra. Hér á síðu félagsins um fræðslufundi má finna frekari upplýsingar. |
|
Áskorun Fuglaverndar vegna vetrarveiða á gæsum |
|
Skrifað af: Jakob Sigurðsson
|
|
Laugardagur, 13. Febrúar 2010 00:00 |
|
Þann 8. febrúar 2010 sendi Fuglavernd umhverfisráðherra, Svandísi Svavarsdóttur eftirfarandi áskorun vegna vetrarveiða á gæsum og sölu á villibráð. Umhverfisráðherra
Svandís Svavarsdóttir
Umhverfisráðuneytinu
Skuggasundi 1
Reykjavík
Varðar vetrarveiði á gæsum og sölu á villibráð
Umhverfisráðherra Svandís Svavarsdóttir
Undanfarin ár hefur borið talsvert á því að grágæsir hafi vetursetu hér á landi sérstaklega á suðurlandi en einnig eitthvað í öðrum landshlutum. Þessir nýju hættir eru ef til vill samfara hlýnandi veðráttu og aukinni kornrækt. Þær voru til skamms tíma eingöngu farfuglar, fyrir utan stofn sem kenndur er við Reykjavíkurtjörn og dvelur á Innnesjum og Suðurnesjum á vetrum.
Núverandi veiðitími miðar við að gæsirnar færu allar af landi brott á haustin en honum líkur, eins og andaveiðitímanum, 15. mars. Það er skoðun stjórnar Fuglaverndar að í ljósi breyttra hátta gæsanna þurfi að endurskoða þennan veiðitíma. Friða þarf vetrargæsirnar en mikið er herjað á þær jafnvel af magnveiðimönnum sem veiða gæsir til sölu. Við leggjum til að gæsaveiðum verði hætt 1. nóvember.
Jafnframt vildum ítreka beiðni okkar til umhverfisráðherra að beita sér fyrir sölubanni á villigæsum, en sú umræða hefur marg oft komið upp í umræðunni um blesgæsina og að mati Fuglaverndar eina leiðin til að friðun blesgæsarinnar skili tilætluðum árangri.
Reykjavík 8. febrúar 2010
F.h. Fuglaverndar
Hólmfríður Arnardóttir, framkvæmdastjóri
Jóhann Óli Hilmarsson, formaður |
|
|
|
|
<< Fyrsta < Fyrri 1 2 3 4 5 6 7 8 9 10 Næsta > Síðasta >>
|
|
Síða 6 af 21 |
