Miðvikudaginn 9. desember býður Magnús Magnússon félögum í Fuglavernd að sjá nýjustu fræðslumynd sína, Í ríki fálkans með Ólafi K. Nielsen. Magnús, Ólafur Karl og Karl Sigtryggsson munu segja frá gerð myndarinnar og svara fyrirspurnum.

Sýningin verður í sal Arion banka, Borgartúni 19 og hefst kl. 20:30.

Myndin Í ríki fálkans með Ólafi K. Nielsen verður til sölu á sýningunni og rennur allur ágóði til Fuglaverndar. Einnig verður hægt að kaupa dagatal Fuglaverndar og tækifæriskort félagsins.

Fundurinn eru öllum opinn svo lengi sem húsrúm leyfir. Athugið að aðgangur er ókeypis fyrir félaga í Fuglavernd en aðgangseyrir er 200 krónur fyrir aðra.

Fuglavernd gefur út dagatal með úrvali fuglamynda sem voru á sýningu áhugaljósmyndara sem Fuglavernd stóð fyrir í ár.

Hægt er að nálgast dagatalið á skrifstofu Fuglaverndar
sem er opin flesta daga fyrir hádegi
en dagatalið kostar 2.300,- krónur.

Það eru 12 ljósmyndarar sem eiga myndir í dagatalinu en þeir eru; Hrafn Óskarsson, Ómar Runólfsson, Björn Arnarson, Óskar Andri Eiríksson, Sindri Skúlason, Gyða Hennings, Þórir Niels Kjartansson, Skúli Gunnarsson, Einar Guðmann, Rán Magnúsdóttir, Jakob Sigurðsson og Sigurður Ægisson. Forsíðumyndina á formaður félagsins Jóhann Óli Hilmarsson.

Dagatalið er í stærð A3 og er því stórt og veglegt.

Þriðjudaginn 10. nóvember verður þriðji fræðslufundur vetrarins. Þá mun Yann Kolbeinsson segja frá ferð sinni til Ecuador.

Fundurinn byrjar kl. 20:30 og er haldinn í húsakynnum Kaupþings í Borgartúni 19. Fundurinn eru öllum opinn svo lengi sem húsrúm leyfir. Aðgangur er ókeypis fyrir félaga í Fuglavernd en aðgangseyrir er 200 krónur fyrir aðra.

Ecuador er fremur lítið land í Suður-Ameríku sem liggur um miðbaug. Mjög fjölbreytt búsvæði og lega landsins, sem er tæplega þrisvar sinnum stærra en Ísland, valda því að yfir 1600 fuglategundir hafa verið skráðar þar. Af búsvæðum má nefna þurrt skóglendi við vesturströnd landsins, regnskóga á vestur- og austurhliðum Andesfjalla, opin svæði ofan trjálínu í Andesfjöllunum sem minna þó nokkuð á Ísland og Amazon skógurinn með sitt fjölbreytta vatnakerfi. Auk hinna fjölmörgu varpfugla landsins er þó nokkur fjöldi farfugla frá Norður Ameríku sem dvelur þarna um veturinn.

Yann Kolbeinsson dvaldi í Ecuador í mánuð síðastliðinn vetur og mun segja frá fuglalífi þessa heillandi Suður Ameríkulands. Yann mun sýna úrval mynda úr ferðinni og segja ferðasögu sína. Hér fyrir ofan má sjá mynd af sígaunafugli sem Yann tók á Ecuador.