Heimsókn umhverfisráðherra Svandísar Svavarsdóttur í fuglafriðlandið
Skrifað af: Hólmfríður Arnardóttir   
Föstudagur, 11. Júní 2010 11:24
Í tilefni að ári líffræðilegs fjölbreytileika bauð Fuglavernd umhverfisráðherra Svandísi Svavarsdóttur í fuglaskoðun í fuglafriðlandinu í Flóa nýlega og að skoða nýja fuglaskoðunarskýlið.  Jóhann Óli Hilmarsson, formaður Fuglaverndar og umsjónarmaður friðlandsins leiðbeindi okkur um svæðið en að staðaldri eru um 25 tegundir í fuglafriðlandinu. Fulltrúi Árborgar, Jón Hjartarson forseti bæjarstjórnar, sagði frá samstarfi Fuglaverndar og Árborgar við uppbyggingu friðlandsins og frá væntingum sveitafélagsins til svæðisins og mikilvægi þess sem votlendissvæðis. Hópurinn var þarna að kvöldlagi og sáust lómar á hreiðri, óðinshanar, lóuþrælar, æðabliki, toppendur og skúfendur, álft, ugla og kjóar á hreiðrum.
Alþjóðlegur dagur líffræðilegs fjölbreytileika var 22. maí síðastliðinn en allt árið er helgað þeim boðskap að styðja þurfi við fjölbreytni gena, tegunda og vistkerfa sem mynda líf á jörðinni.  Segja má að svæði eins og fuglafriðlandið í Flóa og uppbyggingin þar sé einmitt kjörið og lýsandi fyrir þá hugsun þar sem fuglar og menn geta notið sín í sátt og samlyndi.
 
Íslenski fjallahjólaklúbburinn með fuglaskoðunarferð
Skrifað af: Hólmfríður Arnardóttir   
Þriðjudagur, 08. Júní 2010 10:36
Fjallahjólaklúbburinn fer þriðjudaginn 8. júní sína árlega fuglaskoðunarferð frá Fjölskyldu og Húsdýragarðinum kl 19:30. Jakob Sigurðsson, félagi í Fuglavernd, verður með í för og segir frá þeim fuglum sem verða á vegi hópsins. Farinn verður hringurinn í Grafarvoginum í rólegheitunum og stoppað oft. Munið eftir sjónaukanum. Ferð fyrir alla fjölskylduna.

Silkitoppa
 
Fugl vikunnar: Toppskarfur – skrítinn og skemmtilegur sjófugl
Skrifað af: Hólmfríður Arnardóttir   
Fimmtudagur, 03. Júní 2010 11:41
Hérlendis verpa tvær tegundir skarfa, toppskarfur og dílaskarfur.  Skarfar eru skyldir súlum og pelíkönum, tilheyra svokölluðum árfætluættbálki.  Skarfar eru dökkir, grannir og langir sjófuglar sem eru mjög sérhæfðir að köfun og eru í laginu eins og brúsar (lómur og himbrimi) og fiskiendur.  

Toppskarfur er nokkru minni og grennri en dílaskarfur.  Í varpbúningi er toppskarfur alsvartur með grænleitri slikju.  Hann virðist hreistraður að ofan vegna dökkra fjaðrajaðra. Uppsveigður fjaðratoppur á höfði er einkenni fullorðinna fugla frá því í janúar fram á vor. Ungfugl er dökkbrúnn með ljósan framháls en ekki ljósleitur á bringu og kviði eins og ungir dílaskarfar.  Eftir köfun þarf toppskarfur að þurrka vængina og situr þá oft og blakar þeim, „messar“.  Hann er fremur klaufalegur þegar hann hefur sig á loft.  Toppskarfurinn heldur sig við strendur og sést nær aldrei inn til landsins eins og dílaskarfur sem sést oft á vötnum og ám fjarri sjó. Verpur í byggðum og er algengastur á lágum eyjum eða hólmum í Breiðafirði og Faxaflóa. Er einnig í lágum klettum, stundum í fuglabjörgum eða í stórgrýtisurðum.  Hreiðrið er hraukur úr þangi, fóðrað með fjöðrum og grasi.  Toppskarfi hefur fækkað á síðustu árum, en hann er allnokkuð veiddur.
 
Hefur útbúið bók um ránfugla og er með aðra í smíðum um spörfugla
Skrifað af: Hólmfríður Arnardóttir   
Miðvikudagur, 19. Maí 2010 12:43

Sigvaldi Eggertsson níu ára fuglaáhugamaður var svo heppinn að vinna sjónauka og bókina Fuglavísi eftir Jóhann Óla Hilmarsson þegar nafn hans var dregið út í Fuglasmiðju Fuglaverndar sem var einn viðburða á barnamenningarhátíð í lok apríl.

Sigvaldi gengur í Grandaskóla, er í fjórða bekk og ásamt því að hafa áhuga á fuglum þá hefur hann áhuga á körfubolta og leiklist. Hann þekkir svo til alla fugla landsins og marga flækinga. Hann hefur þó ekki látið þar við sitja heldur hefur Sigvaldi sjálfur útbúið bók um ránfugla, fagurlega myndskreytta eigin teikningum. Þessa bók gaf hann afa sínum sem að sögn Sigvalda er einnig mikil fuglaáhugamaður. Núna er hann með í smíðum bók um spörfugla og það er aldrei að vita nema fuglabækurnar hans verði fleiri.
 
Áskorun til meindýraeyða og garðeigenda
Skrifað af: Hólmfríður Arnardóttir   
Þriðjudagur, 18. Maí 2010 15:37
Fuglavernd skorar á meindýraeyða að fara að lögum og eyða ekki starahreiðrum meðan egg og ungar eru í hreiðrinu.  Starinn er alfriðaður.  Þessi skemmtilegi fugl, sem hermir svo listilega eftir, er nýlegur landnemi hér á landi.  Hann sækist eftir nábýli við manninn og berst því óværa úr hreiðrinu, sérstaklega eftir að ungar eru farnir.  Það er óværa á öllum fuglum og getur hún borist af fjölda annarra tegunda á menn, sbr. dúnflóna.  Sumir setja út varpkassa í tré eða húsveggi fjarri gluggum, þar sem starinn getur orpið.

Best er koma í veg fyrir staravarp með því að loka glufum og rifum, sem fuglarnir sýna áhuga.  Ef starinn nær að verpa, er nauðsynlegt að bíða eftir að ungar fljúgi, síðan má hreinsa út hreiðrið, eitra og loka fyrir.  Fuglavernd hafa borist fregnir um að misbrestur sé á þessu.

Jafnframt skorar félagið á garðeigendur að eitra ekki garða sína, heldur nota náttúrlegar varnir gegn meindýrum.  Fuglar eru náttúrulegir óvinir skordýra í görðum og þeir bera skaða af að eta skordýr, sem hafa tekið í sig eitur.  Eitrið safnast fyrir í fuglunum og berst síðan upp fæðupýramídann, safnast loks fyrir í rándýrum á toppi hans.
 
Fleiri greinar...
<< Fyrsta < Fyrri 1 2 3 4 5 6 7 8 9 10 Næsta > Síðasta >>

Síða 2 af 21