Vernd búsvæða: Búsvæðavernd er ein af megináherslunum í starfi félagsins. Baráttan fyrir vernd votlendis og endurhæfingu framræstra mýra og tjarna hefur verið eitt af höfuðbaráttumálum okkar á síðustu árum. Fuglavernd hefur átt stóran þátt í því að koma umræðunni um endurheimt votlendis af stað. Fjörur og grunnsævi, sérstaklega í grennd við þéttbýli, hafa verið skert verulega eins og mörg sorgleg dæmi eru um á Innnesjum.

Fuglavernd berst fyrir því að fuglar og búsvæði þeirra skaðist sem minnst vegna framkvæmda. Fuglar byggja tilvist sína á því að geta aflað sér fæðu ásamt því að hafa hentuga staði til hvíldar og varps. Mörg þeirra svæða sem fuglar byggja afkomu sína á eru í hættu vegna athafna mannsins.

Fræðslufundir: Yfir vetrarmánuðina heldur Fuglavernd fræðslufundi mánðarlegai þar sem valdir fyrirlesarar segja frá rannsóknum, ferðum eða öðru sem þykja kann áhugavert. Aðgangur að fræðslufundum er ókeypis fyrir félaga í Fuglavernd.

Vettvangsferðir í Friðlandið í Flóa: Þessar ferðir hafa verið farnir í sumarbyrjum og kunnugir leiðsegja þátttakendum um Friðlandið. Nú er þar risið fuglaskoðunarskýli og göngustígar eru stikaðir á vorin.

Fuglaskoðun: Fuglavernd hefur boðið bæði upp á styttri og lengri fuglaskoðunarferðir. Stundum í samvinnu við önnur félög.

Garðfugladagar: Árlega eru landsmenn hvattir til að skoða og skrá fjölda og tegundir fugla einn klukkutíma í görðum og þá er átt við þá fugla sem eru í garðinum en ekki þá sem fljúga yfir. Garðfugladagar eru venjulega lok febrúar eða í byrjun janúar.

Garðfuglakönnun: Árlega fer fram talning yfir lengri tíma í görðum sem Fuglavernd heldur utan um. 

Fjármál: Fuglavernd byggir afkomu sína að mestu leyti á félagsgjöldum og með aðild að félaginu færð þú áskrift að tímaritinu FUGLAR. Umhverfisráðuneytið hefur svo styrkt einstök verkefni og rekstur að litlu leyti og   Þjóðhátíðarsjóður styrkti um árabil arnarstarfið en framkvæmd vöktunar hefur að mestu færst yfir til Náttúrufræðistofnunar. Pokasjóður verslunarinnar kostaði uppbyggingu í Friðlandinu og hefur styrkt önnur smærri verkefni líka. Fuglavernd hefur til fjáröflunar gefið út kort með fuglamyndum sem eru tilvalin jóla- eða tækifæriskort. Kortin má panta hér á vefnum. Og einnig hefur fuglavernd verið með fuglahús til sölu og dagatal. 

Sögulegt yfirlit

Fuglaverndarfélag Íslands (Fuglavernd) var stofnað árið 1963. Helstu hvatamenn að stofnun þess voru Björn Guðbrandsson, Úlfar Þórðarson, Richard Thors og Þórður Þorbjarnarson. Saga félagsins og starf fyrstu þrjá áratugina snérist að miklu leyti um verndun arnarins, afkomu hans og útbreiðslu.

Birni Guðbrandssyni, sem var aðaldriffjöður félagsins í þrjá áratugi, og hans samstarfsmönnum má eflaust þakka að erninum var bjargað frá útrýmingu hérlendis. Þó svo að örninn sé vonandi kominn yfir erfiðasta hjallann eftir útrýmingarherferðina í byrjun þessarar aldar, á hann enn undir högg að sækja. Stofninn er enn mjög fáliðaður, einungis um 40 varppör. Nauðsynlegt er að fylgjast náið með varpafkomu og dreifingu hans á næstu árum. Fuglaverndarfélag Íslands fylgist enn með haferninum og gengst fyrir talningu á varppörum í samvinnu við Náttúrufræðistofnun Íslands.