Fimmtudaginn 3. september verður fyrsti fræðslufundur vetrarins.

Gunnar Þór Hallgrímsson og Jóhann Óli Hilmarsson munu segja frá fuglalífi og mannlífi á Ammassalik svæðinu og við Zackenberg á norðaustur Grænlandi.

Fundarstaður er húsakynni Kaupþings í Borgartúni 19 og hefst klukkan 20:30.

Í nágrenni fjallsins Zackenberg á NA-Grænlandi er starfrækt rannsóknarstöð (Zackenbergstöðin - 74°30'N / 21°00'W) þar sem fram fer viðamikil vöktun á ýmsum náttúrulegum fyrirbærum. Gunnar dvaldi við rannsóknir á sanderlum í nágrenni Zackenberg um hálfsmánaðar skeið í júlí 2009. Hann mun segja frá fuglum og öðrum dýrum sem urðu á vegi hans á þessu svæði auk þess að gera grein fyrir rannsóknum á sanderlum og öðrum fuglum sem stundaðar eru í nágrenni Zackenberg.

Jóhann Óli dvaldi ásamt Edward B. Rickson í nokkra daga í sumar á Ammassalik svæðinu á Austur-Grænlandi. Þeir sigldu með heimamönnum um hafssvæði full af hafís milli Kulusuk og Tasiilaq og gengu þaðan um nágrennið og skráðu og mynduðu fuglalíf og landslag. Tasiilaq er stærsti bærinn á austurströnd Grænlands og vinabær Kópavogs. Jóhann Óli mun sýna úrval af myndum þeirra félaga og segja ferðasögu frá þessum framandi slóðum, sem eru þó svo nærri okkur.

Þann 29. ágúst verða haldnir tveir fyrirlestrar um fugla í húsakynnum Háskóla Íslands.

Samsvæða tegundamyndun meðal fugla - Sympatric Speciation in Birds

Tímasetning 10:00-11:30

Staðsetning viðburðar:  Askja

Nánari staðsetning:  Stofa 132.

Smellið hér til að lesa nánar um fyrirlesturinn á vef Háskólans

Finkur Darwins og þróun - Evolution of Darwin's Finches

Tímasetning 13:00-15:00

Staðsetning viðburðar:  Aðalbygging

Nánari staðsetning:  Hátíðarsalur

Smellið hér til að lesa nánar um fyrirlesturinn á vef Háskólans

Athugið að báðir fyrirlestrarnir verða á ensku.

Víxlnefur (Loxia leucoptera - e. Two-barred Crossbill) sást í fyrsta skipti á Íslandi á Stöðvarfirði þann 6. ágúst. Fuglinn var i slagtogi með 15 krossnefum.

Yann Kolbeinsson fann og ljósmyndaði fuglinn.

Víxlnefur
Ljósmyndari: Yann Kolbeinsson