Fimmta tölublað Fugla, ársrits Fuglaverndar, er komið út. Sem fyrr er ritið sérlega glæsilegt og þar er að finna fjölbreytt og skemmtilegt efni um fuglalíf á Íslandi og víðar. Meðal þess sem fjallað er um í 5. tbl. er: IBA svæði, haförninn, kornrækt, krossnefir, endur í Friðlandinu, lundabók, vetrarfuglatalningar, hegðun himbrima, flækingsránfuglar, fjallkjói, fuglaljósmyndun, fuglaskoðun á Kúbu, fuglaráðstefna, vargar á Alþingi, um listina að klófest bráð og alþýðuheiti íslenskra fugla.

Sem fyrr er Fuglum aðeins dreift til félaga í Fuglavernd og er áskrift að ritinu innifalin í félagsgjaldi Fuglaverndar. Hægt er að gerast félagi hér á netinu og tímaritið er sent nýjum félögum um hæl.

Fuglavernd hefur tekið upp þá nýbreytni að efna til bókakynningar í jólabókaflóðinu miðju. Það er meiningin að þetta verði fastur liður í framtíðinni, þar sem nýjar fuglabækur verði kynntar, ef einhverjar slíkar koma út á árinu.

Fyrsta bókin sem kynnt verður er Lundinn eftir Jóhann Óla Hilmarsson sem kom út í sumar. Jóhann Óli ætlar að sýna myndir og segja frá því sem hefur vakið einna mesta athygli eftir að bókin kom út, atferli lundans og fleira. Sýndar verða bæði myndir úr bókinni og aðrar sem ekki komust þangað inn. Eftir myndasýninguna verður Forlagið með bókina til sölu á tilboðsverði og jafnframt mun höfundur árita hana. Þá verða kaffiveitingar.

Bókakynningin verður á nýjum stað fræðslufunda Fuglaverndar, í húsi Kaupþings við Borgartún 19, jarðhæð, gengið inn um aðalinnganginn, miðvikudaginn 19. nóvember 2008 og hefst kl. 20:30.

Garðfuglakönnun hefst þann 26. október 2008 og eru aðstæður nokkuð óvenjulegar, ekki bara í þjóðfélaginu heldur einnig í umhverfinu. Ekki hefur verið jafn vetrarlegt um að litast á upphafsdögum könnunarinnar frá því að Fuglavernd hóf hana veturinn 1994-95. Markmið Garðfuglakönnunarinnar er sem fyrr að athuga hvaða fuglar sækja í garða, í hve miklu magni og breytingar í tegundasamsetningu yfir vetrarmánuðina, skoða breytileika milli ára og landsvæða. Árangur í starfi sem þessu veltur að sjálfsögðu á þátttöku félaga í Fuglavernd. Nú sem fyrr eru allir hvattir til þess að taka þátt í könnuninni. Hún er einföld í sniðum og þurfa athugendur a.m.k. að fylgjast með athugunarstaðnum hluta úr degi í hverri viku. Félagar eru hvattir til þess að senda inn niðurstöður fyrir síðasta vetur ef þeir liggja enn á þeim gögnum. Ef niðurstöður eru sendar með pósti þá er utanáskriftin:

Fuglavernd
Garðfuglakönnun
Skúlatúni 6
105 Reykjavík

Netfangið er nú: Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það. og einnig er vakin er athygli á nýjum vef um garðfugla.

Félagar eru hvattir til þess að gefa fuglum í garði sínum, það er skemmtileg og gagnleg tómstund. Upplýsingar um fóðrun garðfugla og hvernig standa megi að garðrækt til hagsbóta fyrir fugla má fá í garðfuglabæklingi Fuglaverndar.

Umsjón með Garðfuglakönnun hafa Ólafur Einarsson og Örn Óskarsson.

Eyðublað fyrir Garðfuglakönnun 2008-2009

Eyðublað fyrir Garðfuglakönnun 2007-2008 (fyrri vetur)